NLA Spiel #6

Euses NLA-Team holt de 1. Sieg und somit wichtigi 3 Pünkt!

Als ersts het uf Position 3 de Andi gege Michel gspilt. De Match isch ned bsunders lang gange, will de Andi es sehr solids Spil gspilt het und somit de Match schnell mit insgesamt nur 4 Pünkt abgeh, chöne für sich entscheide. Glichzitig het de Sven gege de Roger gspilt. Ide erste zwei Sätz het er chli Müeh gha is Spil inecho, günnt de 1. knapp und git de 2. knapp am Roger ab. In Satz 3 und 4 isch es denn besser gange und er günnt die Sätz klar.
Uf Position 4 spilt de Silvan gege de Marcel. Er chan das Spil mit emene chline usrutscher, aber suscht mit guetem Gwüsse 3-0 für sich entscheide. Zum Schluss spilt uf Position 1 de Nici gege de David. Trotz guetem mithebe vom David chan de Nici sis Spil durezieh und günnt das 3-0.

En grosse Dank gaht an Sihltal Fanclub wo extra de lang weg uf Vaduz mitgreist isch und euses Team guet agfüehrt het!

S nächste NLA Spil isch es Heimspiel am 7. Dezember gege Lausanne.