NLA Spiel #8

Letscht Dunnstig isches sowit gsi, s erste Spiel vode Rückrundi, usswärts gege Kriens, isch ahgstande. Da d Helfti vo eusem NLA Team in New York am J.P. Morgan Tournament Of Champions gspielt oder als Zueschauer debi gsi isch, hend mir uf euse alti Grade, unterschützt dur de Iain und de Cédi, däfe setze.

Ide erste Partie vom Abig isches den au scho direkt zum Generationeduell cho, de Michi spielt gege de Nick Greter. De Michi het ide erste Helfti vode Sätz jewiels guet gspielt, gege s Endi isches denn aber läuferisch immer schwieriger worde. Am Schluss verlürt er 0:3 in knappe Sätz

Im zweite Spiel isch den Iain auf de Nils troffe. Gege de klar favorisierti Nils findet er nöd direkt i sis Spiel ine und verlürt die erste 2 Sätz klar. Er chan den aber ufdreihe und de 3 Satz für sich entscheide. Am Schluss setzt sich den am Nils sini Klass dure.

Als dritts chund de Cédi zum sim dritte NLA-Ihsatz. Er spielt solids Squash, aber es langed nöd zum de Leandro zbezwinge. Im 3 Satz chunnt er nomal näch anen Satzgwünn herä, verlürt aber den trotzdem mit 0 zu 3.

Zimlich ziitglich spielt de Mark gege de Tim Rösch. Er started guet is Spiel, gwünnt den de ersti Satz au solid. Im zweite Satz startet er ebefalls starch, nacher wirds Tempo vom Tim chli zhöch und de Match z lang, er verlürt mit 1:3.

Trotz Niederlag is eh tolli Leistig vo eusem „Ersatz-Team“ gsi! Nächst Dunnstig findet den s erste Heimspiel vo de Rückrundi statt. Mir freued eus uf vieli Heimfans!