NLA Spiel #9

Gester Abig het sich s NLA Team 3 wichtigi Pünkt hert erkämpft, sodass s Teamfoti usnahmswiis mal im Sitze gmacht worde isch…

Gstartet het de Iain uf Position 4 gege de Ex-Sihltaler Luca. Es isch eh Partie uf Augehöchi, i dere de Iain de wichtig ersti Satz gwünne chan. Nach verlorenem zweite Satz spielt er im 3. und 4. wieder agriffig und intelligent, macht wenig Fehler und zeigt mit sinere Körpersprach, dass er de Match gwünne will. Er gwünnt i 4 Sätz geg de besserklassierti Luca.

Glichzitig het de Nici uf Position 1 gspielt. Wie immer zeigt de Nici tolls Squash mit Übersicht und spannende Ballwechsel. De Valentin haltet aber guet degege und nutzt, dass en vilicht liecht agschlage Nici nöd ganz uf de Höchi isch. De Nici git darum de 3 Satz ab, chan den aber im 4 nomal ufdreihe und gwünnt am Endi souverän.

En regelrechte abnützigs Kampf het de Andi geg de Michi Baumann. Bereits vor em Match liecht agschlage, gstaltet sich s Spiel als sehr schwer. Er verlürt de Startsatz und muss 2x en Satzrückstand guet mache. Im entscheidende 5. Satz chan de Andi sini coolness bhalte und mit sinere Erfahrig und zahlriche Nicks die wichtige 3 Pünkt fürs Team sichere!

Ebefalls liecht agschlage startet de Sven i sin Match. Er spielt guets und solids Squash geg en starche Gegner. Im 2. Satz chunnt er miteme Satzball au näch an en usglich ane, leider klappts knapp nöd. Im 3. Satz zieht de Luca wieder devo und de Sven entscheidet sich bi Stand vo 1:6 de Match verletzigsbedingt ufzgeh.

Mir wünsched am Andi und Sven ä speedy recovery und hoffed uf ihri Unterstützig bim nächste NLA-Spiel kommendi Wuche:
Uswärts gege d Panthers in Kriens

Danke au a d Heimfans wo eus wie immer Unterstützt hend!