NLA Spiel #10

Letschte Dunschtig isch euses NLA Team es witers Mal uf Kriens greist, dasmal gege d‘Panthers. Da sich d‘Verletzigsliste nachem letschte Dunschtig verlängeret het, spielemer dasmal miteme neu zämegwürflete Team.

Gstartet het de Jan, wo zu sim NLA Debut cho isch. Gemäss Ranking isch de Jan sogar grosse Favorit gsi ih sim Spiel geg de Philip Nuber. Dere Favoriterolle ischer schnell grecht worde und günnt sis Spiel locker 3:0. Damit hetter eh 100%-Qoute ide NLA ;)

Meh oder weniger glichzitig het de Mika geg de Yanick Lindemann gspielt. Er het am Ahfang Müeh gha is Spiel z‘cho und het die erste zwei Sätz leider verlore. Im dritte Satz findet de Mika besser is Spiel und chan mitem Yanick mithalte. Trotz eim Satzball verlürter leider au de 3 Satz.

Mm nöchste Spiel isch de Michi uf de Remo Handl troffe. De Michi het vo Ahfang ah gwüsst, dases schwierig wird und isch drum sehr ahgriffig unterwegs gsi. Trotzdem verlürt de Michi klar mit 0:3

En richtige Abnützigskampf het sich de Iain geg de Benjamin Fischer glieferet. Beidi sind absolut uf Augehöchi gsi. Die erste vier Sätz sind alli is Tiebreak gange. Im 5. Satz zieht de Iain leider chürzer und verlürt de letschti Satz 7:11 und s Spiel 2:3. Trotzdem chan de Iain sehr z‘friede sii mit sinere Leistig!

Witer gahts scho nöchste Dunschtig dehei gege Uster.