Erstes NLA Spiel Saison 23/24

Bericht aus unserem Insta-Account: 1.Heimspiel NLA Sihltal - Pilatus

Gester het d Hiirundi vo de NLA-Saison agfange. Trotz grossem Heimpublikum is leider nöd de Start gsi, wo sich s Team im Vorfeld gwünscht het.

Agfange het de Sven uf Position 1 geg de Nils Rösch. Er het es tolls spiel zeigt geg de höcherklassierti Gegner und gwünnt sogar de 3. Satz. Leider langets nöd für eh Überraschig.
Glichzitig spielt de Silvan uf Position 4. Es isch en durchgehend spannende Match, wo er zwei mal en Satz hinedri gsi isch. Am Schluss ischs nötige Glück nöd uf sinere Siite, er verlürt im Tiebreak im 5. Satz mit 13:15.
De Andi uf Position 2 bekundigt kei Müeh geg sin Gegner. Er gwünnt abklärt in 3 Sätz und gestaht sim Gegner grad mal 12 pünkt zue.
S letschte Spiel vom Abig het de Iain geg de Livio Catenazzi gha. Leider isches ihm nie glunge is Spiel z cho. Er cha zwar de 2. Satz für sich entscheide, zu viel Fehler und Unsicherheite lönd ihn de Match aber am Endi mit 1:3 verlüre.

Es grosses Dank vom Team gad ad Heimfans, wo Zahlrich erschiene sind!

Kommendi Wuche staht scho s nächst Spiel a. S Team spielt uswärts gege Airgate Zürich.