NLA Spiel #4

Am letzte Dunstig het euses Team in Uster versuecht es paar Pünkt guetzmache fürd Tabelle.
D Resultat sind uf beidi Siite relativ klar gsi. Alli Begegnige sind 3:0 usgange.
Ahgfange het de Nici gege de Robin Gadola. Nacheme bitz gwürgte erste Satz isch de Nici meh und meh in Fahrt cho und het sin Gegner dur es sehr abklärts Spiel in Griff becho. Im zweite und dritte Satz het de Nici sis Fiingfühl uspackt und nüt ahbrenne lah.
Ufem Nebecourt het de Viva zwei ganz starchi Sätz gspillt. Praktisch kei Fehler und höche Druck hend am Liam Flückiger fast kei Luft geh zum öpis kreiere. Die Sätz günnt er souverän mit 11:3 und 11:1. Im dritte Satz het sin Gegner denn doch chli meh Druck chöne mache. De Viva laht sich aber ned wegdränge und günnt au de Satz.
Als nöchst het de Sven gege de David Bernet gspillt. De David macht vo Ahfang ah sehr vill Druck, was de Sven chli überrumplet het. Im zweite Satz glingt ihm en bessere Start und au gege Schluss vom Satz isch er wieder dra. Leider langets aber au da ned für en Satzgwünn. Im dritte Satz dreiht de David nomal chli meh uf und dominiert wieder klar wie im erste Satz.
Nebedra isch no de Andi gege de Miguel Mathis am spiele. Im erste Satz isch de Andi guet dra und chan en knappe erste Satz gstalte. Über d Längi channers denn leider ned ganz hebe und muss sich ide nöchste zwei Sätz resultatmässig relativ klar gschlage geh.
Am Schluss langets leider nur für es negativs Unentschiede nach Punkteunterschied. Dennoch nehmemer jede Punkt mit und gebed bereits nöchste Dunstig gege GC dehei wieder alles!